ཐང་སྐྱབས་དགོན།

2018-08-27

  

  ཐང་སྐྱབས་དགོན་ནི་ཐོག་མར་བཀའ་གདམས་པའི་དགེ་བའི་བཤེས་གཉེན་ཀོ་ཤམ་པ་ཆེན་པོས་ཕྱག་འདེབས་མཛད། རྟེན་དུ་དུས་གསུམ་སངས་རྒྱས་ཉེ་སྲས་བརྒྱད་ཀྱིས་བསྐོར་བ། གཙོ་སྐུ་རྣམ་སྣང་གི་སྐུ་བརྙན་བྱེ་མ་ཨ་འཁྲུངས་ལས་གྲུབ་པ་སོགས་ཡོད། 

  ཆགས་ཚུལ།

  ཐང་སྐྱབས་ལྕགས་ཟམ་ནས་སྤྱིར་བཏང་འཁོར་ལམ་བརྒྱུད་སྤྱི་ལེ་གཅིག་ཙམ་སོང་ན་ཐང་སྐྱབས་གྲོང་དབུས་སུ་དགོན་དེ་མཇལ་རྒྱུ་ཡོད། དགོན་དེ་ནི་ཐོག་མར་བཀའ་གདམས་པའི་དགེ་བའི་བཤེས་གཉེན་ཀོ་ཤམ་པ་ཆེན་པོས་ཕྱག་འདེབས་གནང་མཛད། ཀོ་ཤམ་པས་དགོན་དེ་ཕྱག་མ་བཏབ་གོང་གནས་དེར་ཉི་མ་ལྷ་ཁང་ཞེས་ལྷ་སའི་གཙུག་ལག་ཁང་མ་བཞེངས་གོང་ཡང་འདུལ་གྱི་གཙུག་ལག་ཁང་ཞེས་ཆུ་རྡོ་གྲམ་རིལ་གྱིས་བཞེངས།

   རྟེན་གཙོ།

  རྟེན་དུ་དུས་གསུམ་སངས་རྒྱས་ཉེ་སྲས་བརྒྱད་ཀྱིས་བསྐོར་བ། གཙོ་སྐུ་རྣམ་སྣང་གི་སྐུ་བརྙན་བྱེ་མ་ཨ་འཁྲུངས་ལས་གྲུབ་པ་སོགས་ཡོད་གསུངས། དེ་རྗེས་ཀོ་ཤམ་པས་རྒྱ་རྡོ་ལས་བརྩིགས་པའི་འདུ་ཁང་བཞེངས། ཐང་སྐྱབས་ཞེས་པ་ནི། སྔོན་ཇུན་གར་གྱི་དམག་གནས་དེར་ལྷགས་ཏེ་མེ་རྒྱག་སྐབས་སྐུ་གཉེར་གྱིས་མགོན་པོ་བེང་གི་ཞལ་ཐང་ཞིག་ཡོད་པ་དེ་བསྟན་པས་མེ་ཤི་སྟབས་ཐང་སྐྱབས་དགོན་ཞེས་དང་། ཕག་མོ་དགོན། བ་དགོན་པ། ཉི་མ་དང་། བེ་གསེར། རྣམ་རྒྱལ་སེར་ཁང་བཅས་ཀྱིས་རྒྱུན་ཆོས་གནང་དགོས། དགོན་དེར་གཙོ་བོ་ཉི་མ་ལྷ་ཁང་ཀ་རིང་བཞི་དང་། འདུ་ཁང་ཀ་བ་ཉི་ཤུ་རྩ་བཞིར་དགེ་འདུན་བརྒྱ་ལྷག་གིས་རི་བོ་དགེ་ལྡན་ཕྱག་ལེན་མཛད་པ་ཡིན།

   ​གསར་བཞེངས།

  ད་ལྟ་སྔོན་གྱི་ཉི་མ་ལྷ་ཁང་དང་། འདུ་ཁང་རྙིང་པའི་ལྡེབས་རིས། གཞན་ཡང་སྐུ་བརྙན་གསར་བཞེངས་གནང་བ་སོགས་མཇལ་རྒྱུ་ཡོད།

  ཡང་དགོན་དེ་ནས་རྐང་ཐང་མར་ཆུ་ཚོད་གསུམ་ཙམ་སོང་ན་སྐམ་སྐམ་ཞེས་པར་རྭ་སྒྲེང་གི་དགོན་ལག་གཅིག་དང་། ཡང་མུ་མཐུད་སོང་ན་གཡག་སྡེ་པཎ་ཆེན་གྱི་སློབ་མས་ཕྱག་བཏབ་གནང་བས་འོད་སྣ་དགོན་ཞེས་པ་སོགས་མཇལ་རྒྱུ་ཡོད།

  དཔྱད་གཞིའི་ཡིག་ཆ།

  1  བོད་ལྗོངས་རིག་གནས་དྲ་བ།   2016-6-16 

  2  ཆོས་འཕེལ་གྱིས་བརྩམས་པའི 《གངས་ཅན་བོད་ཀྱི་གནས་བཤད་ལམ་ཡིག་གསར་མ》 མི་རིགས་དཔེ་སྐྲུན་ཁང་། སྤྱི་ལོ2004ལོའི་ཟླ7པའི་པར་གཞི་དང་པོ། ཤོག་ངོས218ན་གསལ། 

<