ཧ་ཝར་ཌིའི་སློབ་མས་སློབ་ཆེན་ལོ་བཞི་ཇི་ལྟར་སྐྱེལ་ལམ།

2016-09-28

  ཀྲུང་དབྱང་བརྙན་འཕྲིན་ལས་ཁུངས་ཀྱི་འཛམ་གླིང་གི་སློབ་ཆེན་གྲགས་ཅན་ཞེས་པའི་ལེ་ཚན་བཟོ་མཁན་ཤེ་ཅན་གྱིས་བརྙན་ལེན་ཚོགས་པ་ཁྲིད་ནས་ཧ་ཝར་ཌི་སློབ་ཆེན་ལ་བཅར་འདྲིར་ཕེབས་དུས། ནམ་གུང་གི་ཆུ་ཚོད་གཉིས་ལྷག་ལ་སླེབས་ཟིན་ནའང་སློབ་གྲྭ་ཡོངས་སུ་གློག་འོད་ཁྲ་ལམ་མེར་གཉིད་ཀྱི་བདེ་བ་ལ་ཞུགས་མཁན་མེད་པར། སློབ་གྲྭའི་ཇ་ཁང་དང་དཔེ་མཛོད་ཁང་། སློབ་ཁང་སོགས་ག་ས་ཀུན་ཏུ་དཔེ་གཟིགས་གནང་མཁན་གྱི་སློབ་ཕྲུག་དག་གིས་ཁེངས་ཡོད།

 

  ཤེ་ཅན་ན་རེ། “ཡོན་ཏན་སློབ་པའི་ཚུལ་དེ་འདྲ་བས་དེ་མ་ཐག་ཏུ་ངེད་ཅག་རྗེས་སུ་ཡི་རངས་དགོས་པར་བྱས་སོང་། ཧ་ཝར་ཌི་སློབ་ཆེན་དུ་རིག་པའི་གནས་ལ་བརྩོན་པར་ཉིན་དང་མཚན་དུ་དབྱེ་བ་མེད་པས། ངས་འཛམ་གླིང་ན་གྲགས་པ་ཆེ་བའི་ཨ་རིའི་སློབ་ཆེན་འདི་རུ་སློབ་ཕྲུག་དག་ལ་དཀའ་སྡུག་ཧ་ཅང་ཆེ་བ་ཤེས།”

  “སློབ་གྲྭ་འདི་རུ་ག་ས་གང་དུ་གཉིད་ལ་ཞུགས་པའི་སློབ་ཕྲུག་དག་མཐོང་ཐུབ་ལ། ཐ་ན་ཇ་ཁང་གི་རྐུབ་སྟེགས་ནར་མོའི་སྟེང་དུའང་དེ་བཞིན་ཡིན་ཅིང་། གམ་དུ་ཁ་ལག་བཟའ་རུ་སླེབས་མཁན་དག་གིས་ཀྱང་དེ་ཉིད་ཡ་མཚར་པོ་ཞིག་ཏུ་འཛིན་པར་མི་བྱེད་དེ། རྒྱུ་མཚན་ནི་སློབ་ཕྲུག་དེ་དག་བསླབ་པ་ལ་ཐང་ཤིན་ཏུ་ཆད་ནས་ངལ་གསོས་མ་ཐག་ཏུ་གཉིད་འགྲོ་བས་ཡིན། སློབ་ཕྲུག་མང་ཆེ་ཤོས་ཀྱིས་བག་ལེབ་བཟའ་ཞོར་དཔེ་ཆ་ཀློག་ཞོར་བྱེད་པ་ནི་སྣང་ཚུལ་རྒྱུན་ལྡན་པ་ཞིག་ཡིན།”

  “ཧ་ཝར་ཌི་རུ་བཅར་སྐབས་སློབ་གྲྭ་འདི་གའི་སློབ་ཕྲུག་དག་ལ་དཀའ་སྡུག་ཤིན་ཏུ་ཆེ་བ་ཤེས་ནའང་། ཁོ་ཚོའང་དཀའ་སྡུག་དང་བརྩོན་འགྲུས་འདི་ལ་སྤྲོ་བ་རང་ཤུགས་ཀྱིས་འཕེལ་བཞིན་འདུག་པ་མཐོང་ཐུབ། གཅིག་ཏུ་ཁོ་ཚོ་རང་གིས་སྦྱངས་པར་བྱ་བའི་གནས་དག་ལ་དང་བ་འགོག་མེད་ཅིག་སྐྱེ་ཡི་ཡོད་པ་དང་། གཉིས་སུ་རྗེས་མར་སློབ་གྲྭ་ལས་ཐོན་རྗེས་སྤྱི་ཚོགས་སྟེང་དུ་ལས་འགན་གཙོ་བོ་འཁྲི་བསམ་པའི་འདུན་པ་འཆང་ཡོད་པས་རེད་དེ། སློབ་ཕྲུག་འདི་དག་ལས་ཁོ་ཚོའི་མི་ཚེའི་འཇོན་ཐང་དག་འོད་དུ་སྤྲོ་བཞིན་པ་ཚོར་ཐུབ།”

  ཤེ་ཅན་ན་རེ། “ཧ་ཝར་ཌི་སློབ་ཆེན་དུ་སློབ་གཉེར་གནང་བའི་པེ་ཅིང་སློབ་ཆེན་གྱི་བུ་མོ་ཞིག་གིས། སློབ་གྲྭ་འདིའི་དངོས་གཞི་སློབ་མ་ཞིག་གིས་སློབ་སྐབས་རེ་ལ་མ་མཐའ་ཡང་འདེམས་སྦྱོང་སློབ་ཁྲིད4སྟེ། ལོ་རེ་ལ་སློབ་ཁྲིད8། ལོ་བཞིའི་རིང་ལ་སློབ་ཁྲིད32གདམ་དགོས་པར་མ་ཟད་ཡིག་ཚད་ཀྱང་ངེས་པར་ལོངས་དགོས། སྤྱིར་སློབ་གྲྭའི་རེ་བ་ལྟར་ན་དངོས་གཞི་སློབ་མ་ཞིག་སློབ་གྲྭར་ཞུགས་པའི་ལོ་ཐོག་མ་གཉིས་ཀྱི་རིང་སློབ་ཁྲིད་གཙོ་བོ་དག་ཚར་དགོས་པ་དང་། ལོ་རིམ་གསུམ་པ་ནས་ཆེད་ལས་སློབ་ཁྲིད་གཙོར་བཟུང་ནས་སློབ་དགོས་ཀྱི་ཡོད་ཅེས་སྨྲས་སོང་།”

  “སློབ་ཕྲུག་སྐྱེས་སྟོབས་ཀྱི་རིག་པ་ཤིན་ཏུ་རྣོ་བ་དག་གིས་ད་གཟོད་ལོ་གཉིས་གསུམ་གྱི་རིང་ལ་སློབ་ཁྲིད32རྫོགས་ཐུབ་པ་ལས། ཕལ་མོ་ཆེ་ནི་སློབ་ཁྲིད4སྦྱངས་པ་ལའང་དཀའ་ལས་ཆེན་པོ་ཁག་གི་ཡོད་དེ། སློབ་ཁྲིད་སྐབས་སློབ་ཕྲུག་དག་གིས་གོ་མི་གོ་ལ་མི་ལྟ་བར། དགེ་རྒན་དག་གིས་ཁྲིད་པ་ཧ་ཅང་མགྱོགས་ཤིང་། སློབ་ཁྲིད་ཚར་རྗེས་མུ་མཐུད་དུ་ཀློག་དགོས་པའི་རྒྱུ་ཆའང་རི་བོའི་གཏོས་དང་མཉམ་ལ། དེ་བཀླགས་མ་ཚར་ཚེ་ལས་བྱ་འབྲི་ཐབས་མེད།”

  “པེ་ཅིང་སློབ་ཆེན་གྱི་བུ་མོ་དེས། མོའི་ད་ཐེངས་གཟའ་འཁོར་གཅིག་རིང་ལ་བཀླགས་པའི་དེབ་གྲངས་ནི་པེ་ཅིང་སློབ་ཆེན་དུ་ལོ་གཅིག་ལ་བཀླགས་པ་དང་འདྲ། སློབ་གྲྭ་འདིར་ལས་བྱའང་ཐུང་ཐུང་ཞིག་གིས་མི་ཆོག་པར། དེབ་མང་པོ་བཀླགས་ནས་བསམ་མནོ་ཞིབ་མོ་འཁོར་ཅིང་བློ་རྩེ་གཅིག་ཏུ་གཏད་ནས་འབྲི་དགོས་ཟེར།”

<