བོད་ཀྱི་སྐད་ཡིག་ཐད་ལ་གཞིགས་པའི་བསམ་ཚུལ་ཕྲན་བུ།

2017-02-07

  བོད་ཀྱི་རིག་གནས་དང་སྐད་ཡིག་གི་ཕྱོགས་ཀྱི་དར་རྒུད་ལ་ཐུགས་ཁུར་ཀྱི་སེམས་པ་ལྷོད་མྱོང་ལ་ཨ་ཐང་ཀྱང་ཆད་མྱོང་། ད་དུང་འབད་པ་ཡང་བྱས་མྱོང་བའི་བདག་གིས་འདིའི་ཐད་ལ་བསམ་གཞིགས་གཏོང་ཁུལ་ཞིག་བྱས་པ་ཁྱེད་ཅག་གི་རྣ་བའི་བུ་གར་སྒྲོན་ན་འདི་ལྟར། བདག་གིས་དེང་སྐབས་བོད་ཀྱི་རིག་གནས་དང་སྐད་ཡིག་ལ་ཞིབ་འཇུག་དང་རྒྱུས་ལོན་དེ་འདྲ་བྱས་མྱོང་མེད་མོད། མཐོང་ཐོས་ཀྱི་ཁྲོད་གསལ་འོང་བ་ནི་ད་སྐབས་བོད་ཀྱི་སྤྱི་ཚོགས་སུ་གདེང་འཇོག་དང་བག་ཆགས་ཟབ་མོ་འཇོག་མཁན་ནི་ཤེས་ཡོན་པ་དང་གླུ་བ་གླུ་མ་དེ་ཚོ་རེད་པས་བོད་སྐད་ཡིག་སོགས་ཀྱི་དར་རྒུད་ཀྱང་ཁོ་ཚོར་ཅུང་ཧ་ཅང་གི་རེག་ལས་ཀི་བསམ་ཐལ། རྒྱུ་མཚན་ནི་སེམས་པ་རང་རིགས་ལ་དུང་ཀ་དེ་འདྲ་མེད་པའི་གླུ་བ་གླུ་མ་སྐོར་ཞིག་གིས་བོད་སྐད་རྒྱ་སྐད་དབྱིན་སྐད་དང་བཅས་ཏེ་གླུ་ཚིག་འདྲ་མ་འདྲེས་ལ་རོལ་དབྱངས་གོང་ཆེན་ཞིག་ཉོས་སྟེ་བརྙན་འཁོར་དུ་ཕབ་རྗེས། སྐབས་དེར་མི་རིགས་ཀྱི་འདུ་ཤེས་སེམས་ན་དབེན་པའི་བོད་པ་མང་མང་གི་ཚོགས་དེས་ཀྱང་དེང་རབས་གླུ་དབྱངས་ཟེར་ན་འདི་འདྲ་ཡིན་དགོས་ཀྱི་སྐད་ཆ་ལབ་བཞིན་ཤེས་མདོག་ཅིག་གིས་ལེན་མཁན་དེའི་རྗེས་སུ་རང་ཚུགས་མེད་པར་སྙེག་འགྲོ་ཀི་རེད། དེ་ནི་ཁོ་ཚོའི་བཞག་པའི་ཤན་ཤུགས་ཡིན་ལ། དེ་དུས་མི་རིགས་རང་ལ་འདུ་ཤེས་ཟབ་པའི་བོད་པའང་ཇེ་ཉུང་དུ་འགྲོ་སྲིད་སྙམ་ལ། སྐབས་དེར་བོད་སྐད་ཀྱི་གླུ་སྐད་གསེབ་ནས་མི་རིགས་ཀྱི་འདུ་ཤེས་དང་ལ་རྒྱའི་འགན་འཁྲི་ཅན་གྱི་མི་བུ་ག་ཚོད་ཡོད་དམ། གཅིག་ཀྱང་མེད་དུས་མི་རིགས་གཞན་ཞིག་ནས་ཁྲིད་ཡོང་ནས་གླ་དགོས་པའི་དཔེ་སྲིད་དམ། དཔེར་ན་ཨ་མ་ལེ་ལྟ་བུ་ཞིག་གིས་བོད་ཀྱི་སྐད་ཡིག་འཛིན་དགོས་སམ། འདི་ནི་མི་རིགས་ཀྱི་ཡོད་ཚད་ལ་ལ་རྒྱའི་འགན་འཁྲི་མེད་པའི་གླུ་བ་གླུ་མ་དེ་ཚོས་བཟོས་པའི་ནག་ཉེས་རེད་བསམ་ཡོད། རྗེས་མ་ཁྱེད་ཚོས་བཅོས་བསྒྱུར་རེ་བྱེད་རྒྱུ་ཕ་སྐད་ལ་ཐུགས་འཁུར་མཛད་བཞིན་པ་རྣམས་པའི་ཚབ་ནས་རེ་བ་ཞུས་པ་ཡིན། འདིར་ཕ་སྐད་གཙང་མའི་ངོས་ནས་གླུ་གཞས་གཏོང་མཁན་དག་ལ་རྗེས་སུ་ཡི་རང་དང་སེམས་དང་རུས་རྐང་སྟེང་ནས་རྒྱབ་སྐྱོར་ཡོད། དེ་ཡང་རྡུང་ལེན་རྒྱ་སྐད་ཀྱིས་ལེན་མི་ཤེས་པ་ཀུན་གྱིས་ཤེས་གསལ་ལྟར་རེད། ལེན་ཤེས་རྒྱུ་ན་མིང་དུ་གྲགས་འདོད་པའི་བོད་པ་འགའ་རེས་ཡང་སྐད་རིགས་འདྲ་མ་འདྲེས་ཀྱིས་ལེན་ན་སྲིད་མོད་སྐད་ཆ་འདི་སྐབས་དང་མི་འབྲེལ་པས་གཡུགས་ཞོག རྗེས་སུ་ཡི་རང་བྱེད་འདོད་པ་དག་ནི་ཕ་སྐད་གཙང་མའི་ལམ་ནས་གླུ་དབྱངས་ལེན་མཁན་གངས་ཅན་པ་སྒྲོལ་མ་སྐྱབས་དང་རིག་འཛིན་སྒྲོལ་མ་སོགས་ལ་བཤད་པ་ཡིན། 

  

ཡང་དེ་ནས་ཤེས་ཡོན་པ་ཚོས་སྦྲགས་སྐད་བཤད་པ་ནི་ངོ་མ་སྙིང་ལ་གཟན་པ་ཞིག་རེད། ལྷག་པར་དུ་མཚན་སྙན་གྲགས་ཅན་གྱི་ཤེས་ཡོན་པ་ཞིག་ཡིན་ཚེ་ཁོ་བོའི་མིང་དེ་ངོས་འཛིན་བྱེད་ཞོར་ཁོང་ཚང་གིས་ཀྱང་སྦྲགས་སྐད་བཤད་བཞིན་གདའ་ང་ཚོས་བཤད་ན་སྐྱོན་ནི་མ་རེད་ཟེར་དང་འདོད་མཁན་གྱི་བོད་པ་གླེན་རྒན་འགའ་རེ་མཆིས་པས་མཁས་རྒན་ཁྱོད་ཚོས་ཀྱང་འདིའི་ཕྱོགས་སུ་མནོ་སེམས་རེ་བཏང་ན་བསམ་པའི་བྲིས་པ་ཡིན། ད་ལྟ་ང་ཚོས་བོད་སྐད་ཡིག་ཉམས་དམས་སུ་འགྲོ་བཞིན་པ་འདི་མཐུན་སྒྲིལ་གྱི་སྒོས་མྱུར་དུ་མྱུར་སྐྱོབ་བྱེད་ན་སྐྱོབ་དུས་རེད་བསམས་སོ།། 
<