དྲན་པའི་ནང་གི་ལྷ་ས།

2018-02-07

  འཆི་མེད། 

 

  ས་ལ་མ་རེག་ལུས་པོ་བར་སྣང་ནས་འཁོར་ཏེ།། 

  ལྕགས་ཀྱི་གཤོག་པ་བརྐྱངས་ནས་ལྷ་ས་ལ་འཕུར་ཡོང་།། 

  ལྷ་སའི་གནས་མོ་ཨ་ཇོ་སྟག་ཤར་གྱི་ཚོགས་ལ།། 

  བས་མཐའི་སེམས་རྩ་འཁོལ་བའི་མཇལ་ཁ་ཞིག་ཞུ་འདོད།། 

   ལྷུན་པོ་རྔམ་བརྗིད་ཅན་གྱི་པོ་ཏ་ལའི་རྩེ་མོར།། 

  

  མེས་པོའི་ང་རྒྱལ་འཁྱིལ་བའི་འཁྲུལ་སྣང་ཞིག་སྐྱེས་ཏེ།། 

  ལྷམ་མཐིལ་དལ་གྱིས་རྡོ་སྐས་སྔོན་མོའི་སྟེང་འཇོག་དུས།། 

  རང་ཉིད་ཀོང་ཇོ་ཡིན་པའི་རྨི་ལམ་ཞིག་བཏང་སོང་།། 

   ཀོང་ཇོས་སྐྲ་ལོ་དཔྱངས་ནས་རྡོ་སྐས་འདི་བརྒྱུད་དུས།། 

  

  བཙན་པོ་རལ་བ་བཤིག་སྟེ་གུས་གུས་ཀྱིས་བརྒྱུགས་ཡོང་།། 

  མགར་གྱིས་དགྱེ་དགྱེ་བྱེད་བཞིན་ཇ་སྟོན་ཞིག་དྲངས་ཚེ།། 

  ཀོང་ཇོས་འཛུམ་འཛུམ་ངང་ནས་མ་བཞེས་ཚུལ་མཛད་ཡོད།། 

   རྨི་ལམ་དེ་འདྲ་རྨིས་པའི་ང་རང་གི་ཡིད་སེམས།། 

  

  ལོ་ཆེན་སྤྱན་གྱིས་གཟིགས་སའི་སྒེའུ་ཁུང་འདི་བརྒྱུད་ནས།། 

  ཕྱི་རོལ་ཁ་བ་ཆགས་པའི་རི་རྩེ་དེར་བལྟས་ཏེ།། 

  འདས་དོན་ལོ་རྒྱུས་རིང་མོས་ཤུགས་རིང་ཞིག་ཤོར་སོང་།། 

   ལྕགས་སྡོང་རལ་བ་ཅན་གྱི་རི་བོ་འདི་ཉམ་ཐག། 

  

  སྣ་ཁུང་འཕྲུལ་གྱིས་ཕུག་པ་རླངས་འཁོར་གྱི་རྒྱུ་ལམ།། 

  མཆོད་རྟེན་རྩེ་མོར་འཁོར་བ་གློག་སྡོང་དང་ཤེལ་ཏོག། 

  མི་འཁྱར་སྣ་མང་འདུས་པས་སུན་སྣང་གིས་གཡོན་འདུག། 

   ཇོ་བོ་ལོ་ཀེ་ཤྭ་རར་གུས་ཕྱག་ཅིག་ཕུལ་ཏེ།། 

  

  སྣ་དགུ་སྡུག་ཡུས་ཕུལ་ནས་འཁང་ར་ཞིག་ཞུས་ཡོད།། 

  པུས་མོ་ས་ལ་འཛུགས་ས་ཁྱེད་རང་གི་དྲུང་ཡིན།། 

  བཙན་པོའི་མགོ་བོ་སྒུར་ས་ཁྱེད་རང་གི་དྲུང་ཡིན།། 

   ཁྱེད་རང་བཞེངས་ཏེ་བཞུགས་པའི་གཙང་ཁང་འདིའི་ཀླད་ནས།། 

  

  ཨ་ཅེ་རྒྱ་མོ་བརླ་ཐོག་བརླ་བཞག་གིས་འགྱིངས་ཏེ།། 

  ས་བཅོས་ཆུ་བརྟགས་བྱས་པའི་ཕྱག་ལས་ལ་བྲེལ་སྐབས།། 

  མ་འོངས་དེ་རིང་ཁྱེད་ཀྱིས་མི་གསུང་དོན་ཅི་ཡིན།། 

   རྒྱལ་བློན་གཉའ་བ་སྒུར་བཞིན་མཐའ་འདུལ་གྱི་ལྷ་ཁང་།། 

  

  བོད་ས་སྲིན་མོའི་སྙིང་དང་སྤྱི་གཙུག་ལ་བཞེངས་དུས།། 

  འཇོ་སྒེག་གཡེར་བག་ཅན་གྱི་རྒྱ་མོ་ཡི་འཛུམ་ལ།། 

  མ་ཆགས་ཡར་ལུང་དཔའ་བོ་སུ་ཞིག་རང་ཡོད་དམ།། 

   ཇོ་མོ་ས་རྩིས་མཁན་གྱི་ས་དཔྱད་དང་རྩིས་ཀྱིས།། 

  

  བོད་ཀྱི་ས་ལ་མཐའ་འདུལ་ཡང་འདུལ་རང་བྱས་འདུག། 

  དེ་ནས་བཟུང་སྟེ་ངོ་མ་བོད་ཡུལ་འདི་ཐུལ་སོང་།། 

  དཔའ་བོའི་དཔུང་རྒྱུན་དམ་པའི་ཆོས་རྒྱུན་ཡང་ལྷོད་སོང་།། 

   

    རི་མོ་བྲིས་མ་ཙམ་གྱི་གྱན་ཐང་རེ་བཤམས་ཏེ།། 

  སྔོན་དུས་བཙན་ཕྱུག་འཛོམས་ཞེས་གང་ནས་ཀྱང་བཤད་ཡོང་།། 

  རི་མོ་དེ་ལ་བལྟས་ན་རི་མོ་ཙམ་ཡིན་འདུག། 

  ཐ་ན་ལོ་རྒྱུས་བདེན་པའི་དཔང་རྟགས་ཀྱང་དཀའོ།། 

    ས་མཐའ་ཧྲིལ་གྱིས་སྒུལ་བའི་དཔའ་བོ་ཞིག་ཡོད་ན།། 

 

  གནམ་ས་སློག་པར་ནུས་པའི་མཛངས་མི་ཞིག་ཡོད་ན།། 

  བདེ་མོ་འཇོག་ལ་ཉེ་བའི་ཕོ་བྲང་དང་ཇོ་ཁང་།། 

  ཕྱི་ཐག་བསྲིང་བའི་ཞུ་བ་དུས་ཐོག་ལ་སྨིན་ཤོག། 

   རྡོ་ནག་བརྩེགས་མའི་རྡོ་རྐས་རྐང་འོག་ལ་ལྷུང་དུས།། 

  

  ཤིང་རྒན་གྲུ་བཞིའི་སྒེའུ་ཁུང་མིག་ལམ་ལ་བརྒྱུད་དུས།། 

  ཕོ་བྲང་རྩེ་ནས་ཕྱོགས་མཐའི་རི་ལྗོངས་ལ་ལྟ་དུས།། 

  ཚོར་བ་འཁྲིགས་ཏེ་བྲང་ཁ་ལག་ཟུང་གིས་གནོན་དུས།། 

    བཞུད་པའི་ལོ་ཟླ་དཔའ་བོའི་གད་རྒྱངས་དེ་དྲན་ཡོང་།། 

 

  ཆེན་པོའི་རང་རློམ་མེས་པོའི་ཞལ་གདམས་ཀྱང་དྲན་ཡོང་།། 

  སྲོག་གིས་བརྗེས་པའི་བཙན་པོའི་ས་ཁྱོན་ཡོངས་དྲན་ལ།། 

  སྨག་ཆེན་སྒྲོན་མེ་བསམ་ཡས་ལོ་ཆེན་རྣམས་དྲན་ཡོང་།། 

    དྲན་པའི་རྨི་ལམ་གཙང་བོའི་མཆོངས་རྔམ་དང་འགྲོགས་ཏེ།། 

 

  གང་གཱའི་ངོགས་སུ་བསྐྱིལ་བའི་སྣང་བ་འདིས་བསླུས་ཏེ།། 

  དར་ཅིག་ཕོ་བྲང་རྩེ་ནས་དབང་མེད་དུ་ཧད་ན།། 

  སེམས་ཁོང་གྲང་བའི་ནོངས་འགྱོད་འཕར་མ་ཞིག་འཕེལ་འོང་།། 

    ང་ལ་ཅི་ཡོད་ཨ་ཇོ་གནས་མོ་ལགས་མཁྱེན་ནོ།། 

  

  མི་སེམས་རྨས་མ་གསོ་བའི་གསོས་སྨན་ཞིག་གནང་རོགས།། 

  སེམས་ཀྱི་མེ་ལོང་འདི་ལ་རྡུལ་ཕྱིས་ཤིག་མཛོད་ཀྱེ།། 

  ཡོད་ཚད་དྲན་པར་ཉར་ནས་གསོལ་བ་ཞིག་བཏབ་ཡོད།། 

   ༢༠༡༦. ༩. ༢༧ ཉིན་དབུས་སུ་བྲིས། 

  རྩོམ་སྒྲིག་པ། དོ་རྒྱ་དོན་གྲུབ་ཚེ་བརྟན། 

<